जालना : दानवे आणि खोतकर यांच्या मनोमिलनाच्या चर्चा सुरू

मागच्या दोन दिवसापासुन रावसाहेब दानवे हे खोतकर यांना जाऊन भेटत आहे…

जालना : राज्याच्या राजकारणात भाजप आणि एकनाथ शिंदे यांच्या शिवसेनेमध्ये महायुती असली तरी जालना लोकसभा मतदारसंघांमध्ये मात्र महायुतीचे उमेदवार रावसाहेब दानवे यांच्या प्रचारामध्ये शिवसेना शिंदे गटाचे नेते अर्जुन खोतकर हे सहभागी झालेले नव्हते. त्या पार्श्वभूमीवर शुक्रवारी रावसाहेब दानवे यांनी सकाळी अर्जुन खोतकर यांच्या घरी जात भेट घेऊन त्यांची नाराजी दूर करण्याचा प्रयत्न केला होता. आज पुन्हा दानवेंनी खोतकर यांच्या घरी जाऊन भेट घेतली. दोघांमध्ये अर्धा तास चर्चा झाली आहे.

महायुतीचे उमेदवार रावसाहेब दानवे यांनी शुक्रवारी सकाळी अर्जुन खोतकर यांचं दर्शना निवासस्थान गाठले आणि खोतकरांची गळाभेट घेतली. दोन नेत्यांच्या भेटीची बरीच चर्चा झाली. त्यांच्या गळाभेटीचे फोटो समोर आले. ते सोशल मीडियावर चर्चेचा विषय ठरले. दानवेंच्या समर्थकांकडून या भेटीचे फोटो व्हायरल करण्यात आले होते. त्यामुळे दानवे आणि खोतकर यांच्या मनोमिलनाच्या चर्चा सुरू झाल्या आहेत.

महायुतीचे उमेदवार आणि जालन्याचे पाच टर्मचे खासदार रावसाहेब दानवे यांच्या प्रचारार्थ जालन्यातील गोलापांगरी येथे आज जाहीर सभेचे आयोजन करण्यात आले असून या सभेला शिवसेनेचे नेते अर्जुन खोतकर उपस्थित राहणार आहेत. रावसाहेब दानवेंना उमेदवारी जाहीर झाल्यापासून अर्जुन खोतकर हे दानवेंच्या प्रचारापासून अलिप्त होते. त्यामुळे खोतकर पुन्हा नाराज असल्याच्या चर्चा होत्या. मात्र शुक्रवारी आणि आज झालेल्या भेटीनंतर दोघांचे मनोमिलन झाले असून रावसाहेब दानवे यांच्या प्रचारामध्ये अर्जुन खोतकर दिसतील, असा विश्वास कार्यकर्त्यांकडून व्यक्त केला जात आहे.